Në TikTok ka video argëtimi pafund, por faqja nuk konsiderohet si një burim i besueshëm për këshilla shëndetësore. Megjithatë, shumë TikTokers po përpiqen të bindin komunitetin e mediave sociale se shtimi i limonit në kafe është sekreti për të humbur peshë.
Ideja është mjaft e thjeshtë: shtrydhni pak limon në kafenë tuaj për të ndihmuar në djegien e yndyrës dhe, rrjedhimisht, të filloni të humbni peshë.
Shumë përdorues të TikTok kanë postuar video duke provuar trendin. Dikush tha se nuk shijon. Një tjetër tha se e provoi për disa kohë, por në fakt shtoi peshë. Të tjerë betohen se funksionon.
Por a funksionon vërtet? Dietologët përgjigjen:
Dietologia Samantha Cassetty tha se është thjesht një tjetër trend i TikTok pa asnjë vlerë shëndetësore.
SAMANTHA CASSETTY
“Nuk ka asnjë përfitim në shtimin e limonit në kafenë tuaj. Unë në fakt do ta konsideroja këtë sjellje si një flamur të kuq për ushqimin e çrregullt. Ushqimi për humbje peshe nuk duhet të jetë për të kufizuar veten ose për ta detyruar veten të hani ose pini diçka që nuk është e shijshme. Kjo është një shenjë se ju nuk po ndërtoni zakone të qëndrueshme dhe gjithashtu sugjeron që jeni të gatshëm t'i jepni përparësi humbjes së peshës mbi mirëqenien tuaj”, tha ajo.
Dietologia Maya Feller tha se këto lloj sfidash të mediave sociale mund të jenë nxitëse për ata që kequshqehen.
MAYA FELLER
“Këto video dietash virale janë të dëmshme dhe të rrezikshme. Ato janë krijuar nga njerëz pa kualifikime. Është absurd ky fiksim i industrisë së dietave në djegien e yndyrnave dhe humbjen e peshës. Nëse një person kërkon të bëjë një ndryshim në shëndetin e tij metabolik duhet të gjejë një profesionist”, tha ajo.
Cassetty shpjegoi se humbja e peshës është një proces i ndërlikuar që përfshin një sërë sjelljesh të shëndetshme, duke përfshirë ushqimin e shëndetshëm, gjumin, qëndrimin aktiv dhe menaxhimin e stresit. Gjenetika, hormonet dhe faktorë të tjerë janë gjithashtu të përfshirë.
Nga lindi ideja për këtë sfidë virale?
Nuk dihet origjina, por ka të ngjarë që kushdo që e nisi këtë sfidë, nuk është profesionist.
Burimi: tiranapost