Tasqebap
Receta për 4 persona
- 500 gr mish viçi tul
- 2 qepë të thata
- 1 lugë gjelle miell
- 1 lugë gjelle salcë
- 2 kokrra domate
- kripë, piper, vaj
- rigon, gjethe dafine
- 2-3 lugë gjelle verë të bardhë
Në fillim, presim mishin në kubik, dhe i japim një skuqje të lehtë, me vaj ulliri, pastaj shtojmë qepën e grirë imët, kur të jetë vyshkur qepa, hedhim miellin, pastaj salcën dhe domatet të grira në rende. Hedhim me radhë, kripë, piper, rigon dhe ujë, dhe e zjejmë ngadalë në zjarr të lehtë, pa i vendosur kapak, sepse derdhet nga mielli, (për këtë arsye, kjo gjellë nuk rekomandohet të zjehet në tenxhere me presion). Kur të mos ketë më shkumë, e vendosim kapakun, duke lënë pak hapësirë, dhe kur të jetë në përfundim, hedhim verën e bardhë dhe gjethen e dafinës (kam zgjedhur verën e bardhë, sepse e kuqa i jep ngjyrë të errët gjellës, ju përdoreni sipas dëshires).
Që tasqebapi të dali sa më i shijshëm, duhen plot 2 orë në zjarr të lehtë fare. E servirim të ngrohtë, ju bëftë mirë!