Zhvillime pozitive në Barcelonë sa i përket kapërcimit të krizës ekonomike. Pas fjalëve të dy javëve më parë të Mateu Alemany-t, drejtorit të Futbollit, se “momentalisht nuk mund të përballojmë blerjet në janar”, vjen qëndrimi ndryshe i drejtorit të përgjithshëm të klubit “blaugrana”, Ferran Reverter, gjatë konferencës për shtyp për prezantimin e referendumit për miratimin e financimit të “Espai Barça”: “Natyrisht që Barcelona do të mund të bëjë blerje në janar. Në janar dhe në verë. Sigurisht që do të duhet të jemi të kujdesshëm se si do ta bëjmë këtë.”
Muzikë e ëmbël në veshët e trajnerit të ri Xavi Hernandez, i cili ka kërkuar përforcime që kur mori detyrën për të ngritur nivelin teknik të skuadrës.
Sipas “Sport.es”, Xavi ka dhënë indikacione të qarta se si do të ndërhyjë në merkato. Synimi është të forcohen disa pozicione kyçe për skemën që ai preferon, sidomos krahët e mbrojtjes. Në këtë kuptim, një opsion interesant është spanjoll i Chelsea-t, César Azpilicueta. Barcelona po kërkon të arrijë marrëveshje ekonomike me klubet që kanë në pronësi Ferran Torresin (Manchester City) dhe Dani Olmon (Leipzig). E njëjta gjë vlen edhe për Timo Werner dhe Ziyech, marrëdhënia e të cilëve me Chelsean zgjat deri në qershor 2025. Një tjetër lojtar që pëlqehet shumë nga drejtuesit e Barçës është Karim Adeyemi, sulmues i Salzburgut, që do të mbushë 20 vjeç në janar.
Burimi: supersport.al
